Est 7 | NdeIBE | STEP | Inkosi loHamani basebesiyakudla leNdlovukazi u-Esta,

Esther 7

UHamani Uyalengiswa

1 Inkosi loHamani basebesiyakudla leNdlovukazi u-Esta, 2 kwathi besanatha iwayini ngalelo langa lesibili, inkosi yabuza njalo yathi, “Ndlovukazi Esta, kuyini okucelayo na? Uzakukwamukeliswa. Kuyini okucelayo na? Uzanikwa loba yini okungafika kungxenye yombuso.”

3 INdlovukazi u-Esta wasephendula esithi, “Nxa ngifumene umusa kuwe nkosi, njalo nxa inkosi kuyithokozisa, bengicelela ukuphila, yisicelo sami lesi. 4 Ngoba mina kanye labantu bakithi sithengisiwe ukuze sichithwe njalo sibulawe ukuze singabikhona emhlabeni. Ngabe besimane sathengiswa njengezigqili ezesilisa lesifazana, bengizazithulela, ngoba akulahlupho olunje olungabangela ukuthi inkosi iphanjaniswe.” 5 Inkosi u-Ahasuweru wathi eNdlovukazini u-Esta, “Ngubani lowo? Ungaphi umuntu obelesibindi sokwenza into enje?”

6 U-Esta wathi, “Isitha lomuntu ololunya nguyenalo uHamani olomona.” UHamani wasethuthumela phambi kwenkosi lendlovukazi. 7 Inkosi yasukuma igcwele ulaka yatshiya iwayini layo yaya phandle esivandeni sesigodlo. Kwathi uHamani ebona ukuthi inkosi yayisiyenze isinqumo ngempilo yakhe, wasala ngemuva ukuba azincengele impilo yakhe eNdlovukazini u-Esta. 8 Kwathi inkosi isiphendukile esivandeni sesigodlo ingena endlini yedili, yathola uHamani eziphosa esihlalweni lapho u-Esta ayehlezi khona. Inkosi yababaza yathi, “Hawu! kambe udlova indlovukazi yona ikhona lapha endlini lapho engikhona!” Kwathi ilizwi lelo liphuma emlonyeni wenkosi bagubuzela ubuso bukaHamani.

9 Kwathi uHaribhona, omunye wabathenwa ababesebenzela inkosi wathi, “Kulesakhiwo sokulengisa abantu esingamatshumi ayisikhombisa lanhlanu ukuphakama esimiswe eduze lendlu kaHamani. Yena ubesenzele uModekhayi, owaveza icebo elibi ukusiza inkosi.” Inkosi yathi, “Mlengiseni lapho yena!”

10 Bamlengisa kuleso sakhiwo sokulengisa ayesilungiselele uModekhayi. Ulaka lwenkosi lwaseludeda.